لب وسوداني

لب وسوداني
بقول لها ..
ما تيجي نهزر ..
نجري ونلعب ..
ونكسر كل الحاجات ..
ونجيب م اللي فات ..
يومين حلوين ....
قالتلي والنبي إنت فايق ورايق ..

قولتلها ...

طب وليه نتضايق ..
إحنا لسه صغيرين ..
وأكبر عيالنا ..
يا دوب تسع سنين ..
يعني لو بنحكم مصر ..
تبقي يا دوب لفة ونص ..
مش عشرين ..
- وطي صوتك البت بتذاكر .
والواد مصدقت إنه نام ...
إنما إيه اللي صحي ف قلبك ..
من تاني الغرام ..
قولتلها جوايا كلمتين غزل ..
قالتلي والنبي إنت عسل ..
بس الظروف ..
- مالها الظروف ..
فاكرة لما كنتي ..
بتحوشي م المصروف ..
جبتيلي ورد ف عيد ميلادي ..
- وجبتلك بلوفر صوف ..
- وجبتيلي بلوفر صوف ..
- فاكر لما بوستني ..
وإحنا لسه مخطوبين وأبويا لاحظ ..
يالهوي كنت هموت م الكسوف
- فاكرةأول مرة قلت لك بحبك ..
وشك إحمر ..
- إنت اللي وشك كان مخطوف ..
- مش إنتي كنتي بترسمي زمان ..
- وإنت كمان كنت بتكتب شعر ..
- هو احنا بطلنا نحس ..
- إحنا بطلنا نشوف ...
وطلعنا اللب والسوداني ..
وفتحنا التليفزيون ..
وسكتنا تاني ..
ولا زال السبب ..
غير معروف ..


ما خدتش ولا اديت

ما خدتش ولا اديت..
لما وشي بقي أصفر لمونة..
ماخدتش ولا اديت..
ولما اترميت ف قلب الطاحونة..
ما خدتش ولا اديت..
ولما شميت ريحة شياط..
ووقعت فوق دماغي كل الحاجات..
ما خدتش ولا اديت..
ولما قالولي..
من إيه الدم اللي ف وشك..
فين روحك
حاسب..
قلبك بيغشك..
ما خدتش ولا اديت..
ولما حسيت بألم ف راسي
ولقيتني ناسي
اسم ابني الوحيد..
ولما شـوفتك رايحة لحتة بعيد..
ما خدتش ولا اديت..
لحد ما لقيتني مربّط ف جبس وشاش
وشايف كل شيء طشاش
وحواليا ناس كتير معرفهاش..
بيقولولي مين اللي رماك م القطر
يا صابر

لما تلاقي وقت
ماشيه الدنيا عادي
لكن عمري ما صدقت
لما تحس ان انت واحشني
واني حقيقي اشتقت
فوت
يمكن علي العصر تروق
طب وان مارقيتش
يبقي اكيد بالليل هتروق
طب وان مارقيتش
اهو برضه اسمك رحت تجيب
لكن ملاقيتش
لما تبقي رايح
مش عارف علي فين
ولما نتوه من بعض
لما تلاقي وقت
لما تبقي فاضي
لما تلاقي وقت
ماشيه الدنيا عادي
لكن عمري ما صدقت
لما تحس ان انت واحشني
واني حقيقي اشتقت
فوت
يمكن علي العصر تروق
طب وان مارقيتش
يبقي اكيد بالليل هتروق
طب وان مارقيتش
اهو برضه اسمك رحت تجيب
لكن ملاقيتش
لما تبقي رايح
مش عارف علي فين
ولما نتوه من بعض

كده
وف غمضه عين
عارف من امتي مشفتكش
قول من ييجي من سنتين
فوت
يمكن علي العصر تروق
م العتمه...
م الاتوبيس....
و من ابليس...
متخفش من بكره...
من الماضي...
و اياك في يوم....
تحزن ع الفاضي....
و تعالى شوف الاسد.....
ف السيرك و اتفرج....
آخر مسخره ومسطول و بيهرج.....
وف الغابه عامل فيها عفريت.....
بص ع التعبان في ايد حاوي.....
و القرد في سلسلة قرداتي....
سارح ع القهاوي....
كأننا ف كتب الحواديت

بص ع الطبله و ع الزمار....
وشوف القط و يا الفار....
وقولي فين الجد....
وفين الهزار....
دي الهزيمه بشرف....
يا سلام....
و ده التعادل اللي بطعم الانتصار....
وبص على شريط الاخبار....
مفيش زياده ف اسعار الدوا....
و الاهلي يبحث عن مهاجم افريقي....
شاطر ف العاب الهوا....
و جريمة خيانة امانه و شرف....
لما الفينو ابو سمسم...
يبقى ترف...
و اقولك متخفش...
و تقولي بلاش قرف...
..
بص ع الهموم...
لون الهدوم....
شبه المطب....
اللي ف اول طريق الفيوم...
وفي طريق الواحات....
بنعيد من تاني...
نفس الحكايات....
نفس الحفره....
نفس المحكمه....
و نفس القاضي....
قولي بذمتك...
تفرق ايه قلعة الكبش....
عن الزمالك و المعادي...
بقولك...
ملاقيش عندك نشيد بلادي...
بتاع الشيخ سيد درويش
م.

بص ع الهموم...
لون الهدوم....
شبه المطب....
اللي ف اول طريق الفيوم...
وفي طريق الواحات....
بنعيد من تاني...
نفس الحكايات....
نفس الحفره....
نفس المحكمه....
و نفس القاضي....
قولي بذمتك...
تفرق ايه قلعة الكبش....
عن الزمالك و المعادي...
بقولك...
ملاقيش عندك نشيد بلادي...
بتاع الشيخ سيد درويش...
إوعى تقولي مفيش...
ولو مفيش....
برضه عادي

============================

آيس كريم شيكولاتة
سنابل قمح..
مع مرور الوقت بقت بطاطا..
بقت آيس كريم شيكولاتة..
بقت طراطير..
بقت طوابير..
وبقت حاجات كتير..
بتضيع كده بمنتهي البساطة..
حرامي تقليدي..
يسرق جوزين فراخ..
ساعة ف إيدي..
يخطف سلسلة..
ينشل محفظة..
مع مرور الوقت بقي عصابة..
بقي مؤسسة..
بقي صاحب فلسفة..
بقي الأستاذ والكتاب والمدرسة..

شوية رجولة..
مع مرور الوقت بقت كفولة..
بقت بمبرز..
بقت كبسولة..
بقت حبة زرقة..
بقت مش فارقة..
بقت نوع..
حديد طري طوع..
بقت صورة..
وغيرة م اللبان دكر..
بقت ضهر البلد اللي انكسر..
بقت كده وكده..
بس ربك ستر..
وطن جميل براح..
كان بيسقي النيل..
كل يوم أفراح..
آيس كريم شيكولاتة
شوية رجولة.
مع مرور الوقت..
بقي مرطع..
بقي مطمع..
بقي آخر انفتاح..
بقي سداح مداح..
وبقي نكتة بايخة..
من قلب مليان جراح