الرئيسية
(حبة عيال)
ده كلام بيقول كلام
ماسك لجام
فرس العلوم اللى كبا
بحبة عيال
**
حبة عيال بيلعبوا
خدني الفضول
قعدت اقول
إيه ياتري راح يكسبوا
مين هما دول ؟
قالوا حبه نلعب بالتاريخ
وحبه نلعب بالعلوم
حبه وكمان نقلع هدوم
ضحكت شفايفي في البدايه
في النهايه
بكيت نكايه من الذهول
قعدت اقول
حبة عيال
**
حبة عيال
ملوا الميدان
وعملوا زحمه في المكان
خنقوا النفوس
سَدوا الودان
فيهم فصيله ولاد أصول
وصنف تاني له ديول
بس اللي كدني إنهم
نفس الميول
نفس القبول
عيال نفوسها منفسنه
متسهوكه متأمركه
متفرنجه متفرسنه
متبطرسه متغطرسه
غبره وحسره من الزمان
سفسطه علي هرطقه
اسمع ياسيدي المَنطـَقه
بتاعة العيال
**
عنتر هيخطب ديدمونه
كان مهرها الفين لمونه
عبله بتنعي بختها
هيجوزوها غصب عنها من عطيل
ماهو يبقي إبن عمها
هاملت معكسر في الميدان
والغـُز حرقوا ميت ديوان
وروميو بيأدن أدان
جهاد تقول واأسلاماه
لإن غزه والجولان
هيحرروها بالعيال
**
حبة عيال
عيال عيال ملهاش كبير
ملهاش مثيل في القردنه
بيقولوا شعر وطنطنه
وهَم بيسموه غـُنا
متخدش منهم سلطنه
غير المساومه ع الهبل
قرود بتسرح ميمنه
ولايطلعوش ابدا جبل
حاجه كده متهجنه
متكلكعه متعجنه
مستعجله متلهوجه
متبنجه متسرطنه
وان يوم هتنصح
مش هتخلص
فأوعه تفصح
او تمحص
فا العيال
بيخافوا م الجيل القديم
ليخدوا منهم لفدنه
ولا المجال
ورثْ العيال
**
حبة عيال
حبة عيال متفلفسه
متصرصره متخنفسه
حبة عيال متأسلفه
متأسلمه بشعرة معاويه
غاويه فقر وعنظزة
متخدش منهم الا معر ونأوزه
فاليزيد كار ع الحسين
والفتنه من تاني ابتدت
والكل ماَدين لـُه الإيدين
معرفش فين المنتهي
فالدم طرطش ع المشاع
لكن يُشاع انه بـــَلا
سنوي نشوفه في كربلا
عيناً وجوا التلفزه
لعبوا العيال
غلبوا العيال
قتلم عيال
مسكم عيال
**
حبة عيال
خانوا حسهم
معرفش مين كان وزهم
علي نفسهم
قاتلين وسايل دمهم
والجثه لسه ع الطريق
والتهمه لابسه بنيامين
في إيه بيجرىَ
مش هتعرف
مين اللي راح
مين اتقتل
طب مين قتل
أو مين برئ
منتش هتعرف
فكُن شجاع خليك جرئ
قول للعيال حبة خشا
العله وصلت للحشا
مش ناقصه منهم دروشه
ولاناقصه معر وحنتشه
مانتم أساس التربيه
وانتم ميراث الانبيا
ودا كلام بيقول كلام
ماسك لجام
فرس العلوم اللى كبا
بحبة عيال
(طاهر الصوفاني)
اول مشاركه ياصالون العرب
تحياتي للجميع
